श्री गुरुदेव सेवा महिला मंडळ, नवेगाव विरकुंड यांच्या वतीने वंदनीय राष्ट्रसंत श्री तुकडोजी महाराज यांच्या जीवन चरित्रावर आधारित 'ग्रामगीता जीवन विकास परीक्षेचे' आयोजन करण्यात आले होते. या परीक्षेमध्ये गावातील महिलांनी उत्स्फूर्तपणे आणि मोठ्या संख्येने सहभाग नोंदवला. महिलांच्या या कौतुकास्पद सहभागाबद्दल सर्व स्तरांतून त्यांचे जाहीर अभिनंदन करण्यात येत आहे.
या संपूर्ण कार्यक्रमाचे नेटके आयोजन सामुदायिक प्रार्थना मंडळ व महिला मंडळाच्या पदाधिकाऱ्यांनी केले होते. कार्यक्रमाची सुरुवात अतिशय मंगलमय वातावरणात सामूहिक प्रार्थनेने झाली. त्यानंतर उपस्थित मान्यवरांनी आणि उपासकांनी सामूहिक प्रार्थनेचे मानवी जीवनातील महत्त्व या विषयावर आपले अभ्यासपूर्ण मनोगत व्यक्त केले.
सामुदायिक प्रार्थनेनंतर मान्यवरांच्या हस्ते परीक्षेत उत्तीर्ण झालेल्या सर्व महिलांना प्रमाणपत्रे वाटप करण्यात आली.
या सोहळ्याला प्रमुख अतिथी म्हणून श्री क्षेत्र गुरुकुंज आश्रम मोझरी येथील मध्यवर्ती प्रतिनिधी श्री. भारत कारडे, ग्रामगीताचार्य विठ्ठलराव माटे, गुरुदेव प्रचारक मारोतराव खापने दादा, मनोहर चवले आणि देवगडे विनोद मिलमिले,रुपेश वसेकर, रमेश डोंगे,व इतर प्रामुख्याने उपस्थित होते.
या कार्यक्रमाला गावातील सर्व गुरुदेव उपासक, महिला मंडळाच्या सदस्या आणि ग्रामस्थ मोठ्या संख्येने उपस्थित होते. सर्वांच्या सहकार्याने हा कार्यक्रम अत्यंत शिस्तबद्ध आणि उत्साही वातावरणात पार पडला.